മദ്യപാനി, അഭിചാരം സത്യമാക്കുന്നവന്‍, ബന്ധം മുറിക്കുന്നവന്‍ സ്വര്‍ഗ്ഗത്തില്‍ പ്രവേശിക്കില്ല (ഇബ്‌നുഹിബ്ബാന്‍) നിലവാരമുള്ള ബാറും, ഇല്ലാത്ത ബാറും വേര്‍തിരിക്കാനുള്ള ശ്രമത്തിലാണ് ജനാധിപത്യ ഭരണകൂട സ്ഥാപനങ്ങള്‍. ബാറേതായാലും വിളമ്പുന്നത് ലഹരിയാണെന്ന് എന്ത് കൊണ്ട് ചര്‍ച്ചയാവുന്നില്ല.
ശീതീകരിച്ച മുറിയില്‍ അരണ്ടവെളിച്ചത്തില്‍ പളുങ്ക് പാത്രത്തില്‍ കോട്ടിട്ട സാറന്‍മാര്‍ക്ക് യൂണിഫോമിട്ട വൈയ്റ്റര്‍മാര്‍ ലഹരിവിളമ്പിയാല്‍ തുറക്കാമെന്ന് പറയുന്നതിലെ നീതിബോധം വ്യക്തമല്ല.
പാടവക്കിലെ പെട്ടിക്കടകളില്‍ കന്നാസില്‍ നിറച്ചുവെച്ച ചാരായവും, വാറ്റ് കള്ളും കുപ്പി ഗ്ലാസില്‍ പകര്‍ന്നു നല്‍കുന്നതും, പുള്ളിത്തുണിയും, ബനിയനും ധരിച്ച് കടന്നുവരുന്ന കുടിയന്മാരും അകത്താക്കുന്നത് ലഹരിയല്ലെന്ന് വരുമോ?
''മദ്യം'' എന്തായാലും, എവിടെനിന്നായാലും നിഷിദ്ധമാണന്നാണ് മതപക്ഷം. ലഹരി വസ്തുക്കള്‍ ഉണ്ടാക്കുന്നവര്‍ക്ക് മുന്തിരിവില്‍ക്കല്‍ നിഷിധമാണന്ന് പ്രവാചക പാഠം ഉണ്ട്.
വ്യാജസിദ്ധന്മാരും, മന്ത്രവാദവും നാട് നടുക്കുന്നു. അമ്പലങ്ങളിലും പള്ളികളിലും പുണ്യപുരുഷന്മാരായി വിശ്വാസികള്‍ക്ക് മാര്‍ഗ്ഗ ദര്‍ശനം നല്‍കുന്നവര്‍ മനസ്സിലും, അരയിലും കഠാരകൂടി കരുതുന്നവരാണന്നറിയുന്നത് ആരെയാണ് ആശങ്കപ്പെടുത്താതിരിക്കുക. കുറ്റിയാടിയിലെ ശകുന്തള്ളയുടെ മരണം പൂജാരിയും ഭാര്യയും കൂടി നടത്തിയ നിധിവേട്ടയുടെ മറവിലായിരുന്നു. കരുനാഗപ്പള്ളിയില്‍ ഒരു യുവതിയുടെ നട്ടെല്ല് ചവിട്ടി ഒടിച്ചുകൊന്നത് അഭിചാരത്തിന്റെ മറവില്‍. ഇത്തരം അപമാനകരമായ പ്രവണതകള്‍ വളരാനിടവരുന്ന സാമൂഹിക ഭൂമിക സൃഷ്ടിക്കാന്‍ അനുവദിക്കുന്നവര്‍ പ്രതിപട്ടികയിലാണ്. മതസമാജങ്ങള്‍ മാതൃകാപരമാവണം. സസ്‌ക്രിയരാവണം. ആരാധനാ-അനുഷ്ടാന തലങ്ങളോടൊപ്പം കര്‍മ്മ മണ്ഡലം വിപുലപ്പെടുത്തണം. സമൂഹ സമുദ്ദാരണവും നവോത്ഥാനവും അജണ്ടയിലുള്‍പ്പെടുത്തണം.
ബന്ധങ്ങള്‍ക്ക് വിട പറയുന്നവര്‍ ചെന്നുപെടുക ബന്ധനങ്ങളിലാണ്. ആര്‍ഭാഢ-ആസ്വാദന, സ്വാര്‍ത്ത മോഹ വലയങ്ങളെന്ന കുരുക്കഴിക്കാനാവാത്ത ബന്ധനങ്ങളില്‍ പെടാതിരിക്കാനാണ് കുടുംബ ബന്ധം, അയല്‍പക്ക ബന്ധം, സാമൂഹ്യ കടപ്പാടുകളെന്ന ബന്ധം എന്നിങ്ങനെ ആരോഗ്യകരമായ ബന്ധങ്ങളിലേക്ക് മനുഷ്യരെ ഇസ്‌ലാം പറിച്ചുനടാന്‍ പരിശ്രമിച്ചത്.
''നന്മകള്‍ കാതോര്‍ക്കുന്നവരുടെ കൂട്ടായ്മകള്‍ രൂപപ്പെടുത്തി മതശാസനകളും, ആശയങ്ങളും പ്രചരിപ്പിച്ചു ആരോഗ്യകരമായ ജന സമൂഹത്തിലൂടെ സാമൂഹ്യ ബോധം ശക്തിപ്പെടുത്തുകയാണ് കാലം കാതോര്‍ക്കുന്ന കര്‍മ്മം.
