ഫലസ്തീന്‍: ലോകസമൂഹം നിഷ്‌ക്രിയരാകുമ്പോള്‍

      26,000 ചതുരശ്ര കിലോമീറ്റര്‍ വിസ്തീര്‍ണ്ണമുള്ള (48% മരുഭൂമിയും 31% ചെങ്കുത്തായ മലകളും) ഫലസ്തീന്‍ ആ ജനതക്ക് ആരാണ് നിഷേധിക്കുന്നത്? ഇസ്രായേല്‍ എന്ന രാഷ്ട്രത്തിന്റെ പിറവി ചരിത്രത്തിലെ ഭീകരമായ ഒരു വഞ്ചനയുടെ ഫലമാണ്.

     ഭൂമിയുടെ കേന്ദ്രമാണ് ഫലസ്തീന്‍. ഏഷ്യ, ആഫ്രിക്ക, യൂറോപ്പ് എന്നീ ഭൂഖണ്ഡങ്ങളുടെ സംഗമ സ്ഥാനമാണത്. പ്രവാചകന്മാരുടെ പാദ സ്പര്‍ശം കൊണ്ടനുഗ്രഹീതമായ നാട്. മതങ്ങളുടെ പ്രഭവ കേന്ദ്രമാണിത്. നാഗരികതകളും സംസ്‌കാരങ്ങളും ഈ ഭൂമിയെ തഴുകിയാണ് കടന്നുപോയത്. കന്‍ആന്‍കാരായിരുന്നു ഇവിടുത്തെ ആദിവാസികള്‍. പിന്നീട് പല ജനപഥങ്ങള്‍ ഒരുപാട് ശേഷിപ്പുകള്‍ ആവേശിപ്പിച്ച് ഇതിലൂടെ കടന്നുപോയി.
     ജൂതന്മാര്‍ (ഹെബ്രുകള്‍) ഇവിടെ കുടിയേറുന്നത് സഹസ്രാബ്ദങ്ങള്‍ക്ക് മുമ്പാണ്. ക്രിസ്തു വര്‍ഷാരംഭത്തോടെ അവരുടെ ആധിപത്യം തകര്‍ന്നു. സംസാകരങ്ങളുടെ വേലിയേറ്റങ്ങള്‍ക്കിടെ  പലര്‍ക്കും, ഭൂമിയും ചരിത്രവും നഷ്ടപ്പെട്ടിട്ടുണ്ട്.
     അറബ് സംസ്‌കാരമാണിവിടെ പിന്നീട് വേരുറച്ചത്. അവരിലൂടെ ഇസ്‌ലാം മതവും വ്യാപിച്ചു. ഇസ്‌ലാം മതവിശ്വാസികളോടൊപ്പം ക്രിസ്ത്യാനികളും, ജൂതരും ഈ പ്രദേശത്ത് താമസമാക്കി.

     യൂറോപ്യര്‍, പ്രത്യേകിച്ചും ക്രിസ്ത്യാനികള്‍ ഈ പുണ്യഭൂമി പിടിച്ചടക്കാന്‍ നിരന്തരം ശ്രമിച്ചു. കുരിശു യുദ്ധത്തില്‍ അവര്‍ മുസ്‌ലിംകളെ പരാജയപ്പെടുത്തി. കഴിഞ്ഞ സഹസ്രാബ്ദത്തിന്റെ തുടക്കത്തില്‍ സ്വലാഹുദ്ധീന്‍ അയ്യൂബിയാണ് വീണ്ടും റോമിന്റെ ആധിപത്യം തകര്‍ത്തത്. ചോര മണക്കുന്ന കഥകളാണ് ഫലസ്തീന് പറയാനുള്ളത്. സ്വലാഹുദ്ധീന്‍ അയ്യൂബിക്ക് ശേഷം, അല്‍പകാലമൊഴിച്ച്, മുസ്‌ലിംകളാണ് മസ്ജിദുല്‍ അഖ്‌സ്വായടങ്ങുന്ന ഫലസ്തീന്‍ മണ്ണിന്റെ അവകാശികള്‍.
     തുര്‍ക്കിയുടെ അധീനതയിലായിരുന്നു ദീര്‍ഘകാലം ഫലസ്തീന്‍. കഴിഞ്ഞ നൂറ്റാണ്ട് വരെ അത് തുടര്‍ന്നു. 'യൂറോപ്പിലെ രോഗി'യായ തുര്‍ക്കിയില്‍ നിന്ന് ഭൂമി പിടിച്ചെടുക്കാന്‍ യൂറോപ്യന്‍ സാമ്രാജ്യശക്തികള്‍ മത്സരിച്ചു. ബ്രിട്ടനും, ഫ്രാന്‍സും, ജര്‍മനിയുമായിരുന്നു ഇതില്‍ പ്രധാനികള്‍. ഇരുപതാം നൂറ്റാണ്ടിന്റെ ആരംഭത്തോടെ അവര്‍ തുര്‍ക്കിയുടെ മേല്‍ പൂര്‍ണ്ണ ആധിപത്യം സ്ഥാപിച്ചു. 'ഒട്ടോമന്‍ സാമ്രാജ്യത്തിന്റെ' അഴിമതിയും പിടിപ്പുകേടും അവര്‍ക്ക്  ഭംഗിയായി മുതലെടുക്കാനായി.
     ഫലസ്തീന്‍ പ്രദേശത്തെ പ്രകൃതി വിഭവങ്ങള്‍ മാത്രമല്ല, ഭൂമിശാസ്ത്രപരമായ പ്രധാന്യമാണ് യൂറോപ്യരെ ഫലസ്തീനിലേക്ക് ആകര്‍ഷിച്ചത്. 19-ാം നൂറ്റാണ്ടില്‍ എണ്ണ കണ്ടെത്തിയതോടെ ഇത് നിര്‍ണായകമായി. ഇവിടെ വേരുറപ്പിക്കാന്‍ കഴിഞ്ഞാല്‍ എണ്ണ സമൃദ്ധമായ അറബ് ഭൂമിയെ നിയന്ത്രിക്കാമെന്നവര്‍ മനസ്സിലാക്കി.
     അതിനവര്‍ കണ്ടെത്തിയത്, ലോക ജനതയുടെ സഹതാപത്തിന് പാത്രമായ ജൂതരെയാണ്. ഇനിയുമൊരു കുരിശുയുദ്ധം, മതകീയമായ ചേരിതിരിവുകള്‍ക്കും അതിലൂടെ ഛിന്നഭിന്നമായ മുസ്‌ലിംകളുടെ പുനരേകീകരണത്തിനും വഴിവെച്ചേക്കുമോ എന്ന ഭയമായിരിക്കാം, ഒരു തുണ്ട് ഭൂമിയില്ലാതെ അലയുന്ന ജൂതര്‍ക്ക് വേണ്ടി മതുലക്കണ്ണീരൊഴിക്കാന്‍ ചര്‍ച്ചില്‍-ട്രൂമാന്‍ തുടങ്ങിയവരെ പ്രേരിപ്പിച്ചത്.
     വേദപുസ്തകത്തിലെ വാഗ്ദത്ത ഭൂമിയായ ഇസ്രായേലാണ് ഫലസ്തീനെന്നും അവിടെയാണ് എല്ലാ ജൂതന്മാരും ജീവിക്കേണ്ടതെന്നും ആ ഭൂമിയില്‍ മറ്റാര്‍ക്കും അവകാശമില്ല എന്നുമുള്ള തത്വശാസ്ത്ര സയണിസം പ്രചരിപ്പിച്ചത് ക്രിസ്തുമതക്കാരായ സാമ്രാജ്യത്വശക്തികളാണെന്നത് ചരിത്രത്തിലെ രസകരമായൊരു പ്രഹേളികയാണ്. ചൂഷണം മതപരമായ അതിര്‍വരമ്പുകള്‍ ഭേദിക്കുമെന്ന് നാം ചരിത്രത്തിലൂടെ പഠിക്കുന്നു. ജൂത-ക്രൈസ്തവന് ഒരു പൊതു ശത്രുവിനെ സൃഷ്ടിക്കുക എന്നുള്ളതും ചരിത്രത്തിന്റെ നിയോഗമായിരിക്കാം.
     സയണിസ്റ്റ് പ്രസ്ഥാനത്തിന്റെ ഉപജ്ഞാതാവായ തിയഡര്‍ ഹെര്‍സലായിരുന്നു ആദ്യമായി ഈ ഗൂഢാലോചന പുറത്തുവിട്ടത്. 'മണ്ണില്ലാത്ത ജനതക്ക് ജനതയില്ലാത്ത മണ്ണ്'. 45 ലക്ഷത്തോളം നിരാലംബരായ ജനത ഇപ്പോഴും ഫലസ്തീന്‍ മണ്ണിന്റെ മക്കളായി ജീവിക്കുന്നുവെന്നത് ഫലസ്തീന്‍ എന്ന പ്രദേശം ജനതയില്ലാത്ത മണ്ണായിരുന്നുവെന്ന നുണയെ അപ്പാടെ നിരാകരിക്കുന്നു. നുണകളിന്മേലാണല്ലോ അവര്‍ ഇസ്രായേല്‍ കെട്ടിപ്പടുത്തത്. തിയഡര്‍ ഹെര്‍സലിന്റെ നുണ തിന്മയുടെ ഉപാസകര്‍ ആവര്‍ത്തിച്ചു വന്നു.

     1897ല്‍ നടന്ന സയണിസ്റ്റ് സമ്മേളനത്തോടെയാണ് ഇസ്രായേല്‍ എന്ന ജൂത രാഷ്ട്ര പ്രഖ്യാപനത്തിന് പ്രചാരം ലഭിച്ചത്. ഇതിന്റെ സ്ഥാനം അന്ന് നിര്‍ണ്ണയിക്കപ്പെട്ടിരുന്നില്ല. അര്‍ജന്റീന, സൈപ്രസ്, അറേബ്യന്‍ ഉപദ്വീപ്, ഉഗാണ്ട, സീനായ് താഴ്‌വാരം, തുടങ്ങി പല സ്ഥലങ്ങളും ഇതിനായി പരിഗണിച്ചിരുന്നു. പക്ഷെ, അത് ഫലസ്തീന്‍ തന്നെ ആയിരിക്കണമെന്ന് യൂറോപ്യന്‍ സാമ്രാജ്യ ശക്തികള്‍ നേരത്തെ തീരുമാനിച്ചതായി വേണം മനസ്സിലാക്കാന്‍.
     ഇസ്രായേല്‍ എന്ന രാഷ്ട്രത്തിന്റെ വ്യത്യസ്ത ഭൂപടങ്ങള്‍ വരക്കാന്‍ തുടങ്ങി. എല്ലാ ഭൂപടത്തിലും ഇപ്പോഴുള്ള ഇസ്രായേലിന് പുറമേ ജോര്‍ദ്ദാന്‍, ലബനാന്‍, സിറിയ തുടങ്ങിയ പരമാധികാര രാഷ്ട്രങ്ങളുടെ ഭാഗങ്ങളുമുണ്ടായിരുന്നു.  ജോര്‍ദാന്‍ കൂടിച്ചേര്‍ന്നാലേ ഇസ്രായേല്‍ രാഷ്ട്രം പൂര്‍ണ്ണമാവൂ എന്ന് 1882ല്‍ ജൂത ഭരണാധികാരി പറഞ്ഞുവെച്ചു.
     1917ല്‍ ബ്രിട്ടീഷ് മന്ത്രി ജയിംസ് ആര്‍തര്‍ ബാര്‍ഫോര്‍ പ്രഖ്യാപിച്ചു. 'ലോകത്തെ ജൂതന്‍മാരുടെ ജന്മഗേഹമായി ഇസ്രായേല്‍ എന്ന രാഷ്ട്രത്തെ ഞങ്ങള്‍ സ്ഥാപിക്കും'. 1882ല്‍ പ്രദേശത്തെ ജൂതജനസംഖ്യ 24,000 ആയിരുന്നത് 1947 ആകുമ്പോഴേക്കും 5,90,000 ആയി മാറിയത് ഈ ഗൂഢാലോചനയുടെ വിജയമായിരുന്നു.

vഇസ്രായേല്‍ രാഷ്ട്രത്തിന്റെ പിറവിക്ക് മുമ്പ് തന്നെ, 'ഹഗാന' എന്ന ഭീകര സംഘടന നിലവില്‍ വന്നു. നാലായിരത്തോളം കൂട്ടക്കുരുതികളിലായി അവര്‍ പതിനായിരക്കണക്കിന് അറബികളെ കൊന്നു. അനേകായിരങ്ങള്‍ നാട് വിട്ട് പോയി. 1882ല്‍ 5% ആയിരുന്ന ജൂതര്‍; അങ്ങനെയാണ് 1947ല്‍ 42% ആയി മാറിയത്.
     1947ലെ ഐക്യരാഷ്ട്ര സഭയുടെ 181-ാം പ്രമേയമനുസരിച്ചാണ് ഇസ്രായേല്‍ രൂപീകരണം നടന്നത്. ജറസുലമിന്റെ ഒരു ഭാഗമടക്കം, ഗാസയും, വെസ്റ്റ് ബാങ്കുമൊഴിച്ചുള്ള പ്രദേശങ്ങളെയാണ് ഇസ്രായേലായി ബ്രിട്ടണ്‍ അവതരിപ്പിച്ചത്. ജറുസലം അന്താരാഷ്ട്ര മേഖലയായിരിക്കുമെന്നും പ്രഖ്യാപിച്ചിരുന്നു. ഫലസ്തീനികള്‍ക്കും ഇസ്രായേലികള്‍ക്കും രണ്ട് സ്വതന്ത്ര രാഷ്ട്രങ്ങളെന്ന വാഗ്ദാനം നിറവേറ്റപ്പെട്ടില്ല. യു.എസ്. ജനറല്‍ അസംബ്ലിയില്‍ കോസ്റ്ററീക്ക എന്ന ലാറ്റിനമേരിക്കന്‍ രാഷ്ട്രത്തിന്റെ പ്രതിനിധിക്ക് കൈക്കൂലി കൊടുത്തുകൊണ്ടാണ് ഇസ്രായേലിന്റെ ജനനത്തിന് കളമൊരുക്കിയത്. അധര്‍മ്മത്തിലൂടെ സൃഷ്ടിക്കപ്പെട്ട ജാര സന്തതി.!
     42 ലക്ഷത്തിലധികം ഫലസ്തീനികള്‍ ഇപ്പോള്‍ അഭയാര്‍ത്ഥികളാണ്. 17 ലക്ഷം പേര്‍ ജോര്‍ദ്ദാനില്‍ മാത്രമായുണ്ട്. ലബനോണിലും സിറിയയിലും 4 ലക്ഷം പേര്‍. ഗാസയിലും വെസ്റ്റ് ബാങ്കിലും ടെന്റുകളില്‍ 16 ലക്ഷത്തിലധികം പേര്‍.
     ഫലസ്തീനില്‍ ജീവിച്ചിരിക്കുന്നവരില്‍; ലോകബാങ്കിന്റെ കണക്കനുസരിച്ച് 20 ലക്ഷം പേര്‍ (63% പേര്‍) ദാരിദ്ര്യരേഖക്ക് താഴെയാണ്. തൊഴിലില്ലായ്മ 60 ശതമാനത്തില്‍ കൂടുതല്‍, ഭക്ഷ്യക്ഷാമം രണ്ടാം ഇന്‍തിഫാദ(ഉണര്‍വ്വ്)ക്ക്  ശേഷം രൂക്ഷമായി. ജലം, വൈദ്യുതി, ആരോഗ്യരക്ഷ തുടങ്ങിയ സൗകര്യങ്ങള്‍ പരിമിതമാണ്. മനുഷ്യാവകാശ ലംഘനങ്ങളുടെ ഈ ദുര്‍മുഖം ലോക സമൂഹങ്ങളുടെ കുറ്റകരമായ നിഷ്‌ക്രിയത്വത്തിന്റെ സാക്ഷ്യവും കൂടിയാണ്.
     ലോകത്തെ പ്രധാനപ്പെട്ട മൂന്ന് മതവിശ്വാസികളും ഏറെ പുണ്യമായി കരുതുന്ന ഭൂമിയാണത്. മുസ്‌ലിംകളുടെ ആദ്യ ഖിബ്‌ല മസ്ജിദുല്‍ അഖ്‌സ്വ അവിടെയാണ്. മുഹമ്മദ് നബി (സ)യുടെ രാപ്രയാണവുമായി ബന്ധപ്പെട്ട പള്ളിയാണ് ഖുദ്‌സിലെ 'മസ്ജിദുല്‍ അഖ്‌സ്വ'.
     'വിശാല ഖുദ്‌സ്' എന്ന പദ്ധതിയിലൂടെ മറ്റുള്ളവരുടെ സ്വാധീനം നഷ്ടപ്പെടുത്താനാണ് യഹൂദികള്‍ ശ്രമിക്കുന്നത്. 1967ല്‍ ഖുദ്‌സ് നഗരത്തിന്റെ വിസ്തൃതി 6 ചതുരശ്ര കി.മി. മാത്രമായിരുന്നു. 1990 ആയപ്പോഴേക്കും 23 ച.കി.മീ. ആയി അത് വികസിച്ചു. 480 ച.കി.മീ. ആയി വികസിപ്പിക്കാനാണ് അവരുടെ പദ്ധതി. ഖുദ്‌സിന്റെ ഏതെങ്കിലും ഭാഗം അറബികള്‍ക്ക് നല്‍കി പ്രശ്‌നം പരിഹരിക്കാനുള്ള മാര്‍ഗ്ഗവും കൊട്ടിയടക്കാനാണ് അവര്‍ ഖുദ്‌സ് വികസിപ്പിച്ച് കൊണ്ടിരിക്കുന്നത്. അതിന് വേണ്ടി ഖുദ്‌സിനെ വലയം ചെയ്ത് 11 ജനവാസ കേന്ദ്രങ്ങള്‍ അവര്‍ സ്ഥാപിച്ചു. 1,90,000 യഹൂദികള്‍ അവിടെ താമസിക്കുന്നു. ഖുദ്‌സിനെ അറബി - ഇസ്‌ലാമിക പരിസരത്ത് നിന്നും വിച്ഛേദിക്കാന്‍ കുടിയേറ്റ കേന്ദ്രങ്ങള്‍ 17 ആക്കി മാറ്റാന്‍ ഇസ്രായേല്‍ തീരുമാനിച്ചിരിക്കുന്നു. ഖുദ്‌സിലെ ജനസംഖ്യ 6,50,000 ആണിപ്പോള്‍. 4,50,000 ത്തോളം ജൂതന്മാരാണ്. 60 വര്‍ഷങ്ങള്‍ക്ക് മുമ്പ് 100 ശതമാനം മുസ്‌ലിംകളുണ്ടായിരുന്ന പ്രദേശമാണിത് എന്ന് ചേര്‍ത്ത് വായിക്കുക. 
നരസിംഹ റാവുവിലൂടെയാണ് ഇസ്രായേല്‍ ഇന്ത്യയിലെത്തുന്നത്. അതിന് മുമ്പ് വി.പി.സിംഗ് മന്ത്രിസഭയില്‍ വാജ്‌പൈ വിദേശകാര്യ മന്ത്രിയായിരിക്കെ ഇസ്രായേലിന്റെ എന്നത്തേയും യുദ്ധ പ്രഭു മോശെ ദയാന്‍ ഇന്ത്യ സന്ദര്‍ശിച്ചിരുന്നു. പിന്നീട് വാജ്‌പൈ ഭാരതത്തിന്റെ പ്രധാനമന്ത്രി ആയതോടെ ഇസ്രായേല്‍ ഇന്ത്യയുടെ സകല നാഡിഞരമ്പുകളിലും സ്വാധീനം നേടി. എന്നാല്‍, പിന്നീട് വന്ന സര്‍ക്കാറുകളള്‍ ഇസ്രായേലിനോടുള്ള സമീപനം മൃതുവായിരുന്നില്ല.
     നെഹ്‌റുവിന്റെ വേദേശ നയം നിരുത്താന്‍ യാതൊരു ന്യായീകരണവും ഇസ്രായേലിന്റെ ഭാഗത്ത് നിന്നുണ്ടായിരുന്നില്ല. എന്നും ഈ രാഷ്ട്രം അധര്‍മ്മത്തിന്റെ അച്ചുതണ്ടായി നിലകൊണ്ടു. ഇന്ത്യയില്‍ ഇസ്രായേലുമായുള്ള കൂടുതല്‍ ബന്ധം സ്ഥാപിച്ച പാര്‍ട്ടികളില്‍ രണ്ടാം സ്ഥാനം സി.പി.എം.നും, കൂടുതല്‍ ഇടപെടാനവസരം കൊടുത്ത സംസ്ഥാനം പശ്ചിമ ബംഗാളുമാണ്. കമ്യൂണിസ്റ്റ് ചൈനയും, ഹങ്കറിയും, റഷ്യയും ഇസ്രായേലിന്റെ സംരക്ഷകരായി അമേരിക്കക്കൊപ്പം നിലകൊണ്ടുപോന്നു. ഇപ്പോഴും ചൈനയും, റഷ്യയും ഇസ്രായേലിന്റെ നടപടികള്‍ക്ക് അനുകൂല നിലപാടാണ് അന്താരാഷ്ട്ര തലത്തിലെ നയതന്ത്ര നീക്കങ്ങളില്‍ നടത്തി വരുന്നത്.
     വീറ്റോ അധികാരമുള്ള രാഷ്ട്രങ്ങളില്‍പ്പെട്ട ചൈനയും, റഷ്യയും ഇസ്രായേലിനെതിരില്‍ അന്തര്‍ദേശീയ രംഗത്ത് സ്വീകരിച്ച നിലപാടുകള്‍ പരിശോധിച്ചു നോക്കണം. അറബികളോടും, വിശിഷ്യാ ഫലസ്തീനികളോടും ഇന്ത്യ കാണിച്ച നീതിയുടെ സമീപനങ്ങള്‍ ഒരു ഘട്ടത്തിലും കമ്യൂണിസ്റ്റ് രാഷ്ട്രങ്ങള്‍ സ്വീകരിച്ചിരുന്നില്ല. ഇപ്പോള്‍ തന്നെ വെസ്റ്റ് ബംഗാളിലെ പ്രധാന മുതല്‍മുടക്ക് രാഷ്ട്രവും പങ്കാളിത്ത രാഷ്ട്രവും ഇസ്രായേലും അവിടുത്തെ സര്‍ക്കാര്‍ സ്ഥാപനങ്ങളുമാണ്.
      ഇസ്രായേലിന്റെ ഐ.ഡി.ബി (ടെലികോം) മോണ്ടീസിസ്സര്‍ (റിയല്‍ എസ്റ്റേറ്റ്) ഇ.എം.ഐ. (ആരോഗ്യം) എന്നീ കമ്പനികള്‍ക്ക് ബംഗാളില്‍ വന്‍ നിക്ഷേപവും പദ്ധതികളും ഉണ്ട്. ബംഗാളില്‍ ഏറ്റവുമധികം ധനമിറക്കുന്ന രാഷ്ട്രമാണ് ഇസ്രായേല്‍. ബംഗാള്‍ മുന്‍ മുഖ്യമന്ത്രി ബുദ്ധദേവ് ഭട്ടാചാര്യ നിരവധി ഇസ്രായേല്‍ കമ്പനികളുമായി ചര്‍ച്ചകള്‍ പൂര്‍ത്തിയാക്കിയിട്ടുണ്ട്. 2004ല്‍ത്തന്നെ ബംഗാള്‍ സര്‍ക്കാര്‍ ഇസ്രായേലുമായി സാമ്പത്തിക ഉടമ്പടികള്‍ക്ക് തയ്യാറായിട്ടുണ്ട്. 2004ലെ ഫിലിം ഫെസ്റ്റിവലില്‍ സംബന്ധിക്കാന്‍ കൊല്‍ക്കത്തിയെത്തിയ ഇന്ത്യയിലെ ഇസ്രായേല്‍ അമ്പാസഡര്‍ ഡേവിഡ് ഡാനിയേല്‍ ആണ് ബംഗാളുമായി വാണിജ്യ, വ്യാപാര ബന്ധങ്ങള്‍ സ്ഥാപിക്കാന്‍ തീരുമാനിച്ച വിവരം പ്രസ്താവിച്ചത്.
     സ്റ്റീല്‍, ഇരുമ്പ്, പ്ലാസ്റ്റിക്, ഭക്ഷ്യോല്‍പാദനങ്ങള്‍, രത്‌നങ്ങള്‍ തുടങ്ങിയ മേഖലകളിലും ടെലികോം, പേപ്പര്‍, ഇന്‍ഷൂറന്‍സ്, കണ്‍സ്യൂമര്‍ ഇലക്‌ട്രോണിക്‌സ്, റിയല്‍ എസ്റ്റേറ്റ് മേഖലകളിലും ജൂത രാഷ്ട്ര പങ്കാളിത്തം ബംഗാളില്‍ വേരോടിയിട്ടുണ്ട്. ഇസ്രായേലുമായി ഇത്ര ആഴത്തില്‍ ബന്ധമുള്ള മറ്റൊരു സംസ്ഥാനവും ഇന്ത്യയിലില്ല. നരേന്ദ്ര മോഡിയുടെ ഗുജറാത്ത്‌പോലും ഇസ്രായേലിന്റെ വന്‍ ചങ്ങാത്ത സംസ്ഥാനമല്ല. ബി.ജെ.പി. നേതാക്കള്‍ക്കും, കമ്യൂണിസ്റ്റ് നേതാക്കള്‍ക്കും ഇസ്രായേല്‍ ഭരണകൂടങ്ങളുമായും, കുത്തക കമ്പനികളുമായും ഉലയാത്ത സുദൃഡബന്ധം നിലവിലുണ്ട്. ബില്യണ്‍ കണക്കിന് ഡോളര്‍ മുതല്‍മുടക്കി ബംഗാളില്‍ റോഡ്, കുടിവെള്ളം തുടങ്ങിയ മേഖലകളിലും ഇടപെടാനുള്ള നീക്കങ്ങള്‍ നടന്നുവരുന്നു. 'പരിപ്പ് വടയും കട്ടന്‍ചായയും' ഇപേക്ഷിച്ചു 'കശുവണ്ടിയും പെപ്‌സിയും' സ്വീകരിച്ചു കമ്മ്യൂണിസ്റ്റ് നേതാക്കള്‍ സാമ്രാജ്യത്വ ശക്തികളേയും കോര്‍പറേറ്റ് മുതലാളിമാരേയും തേടി നെട്ടോട്ടത്തിലാണ്. ഇന്തോനേഷ്യയിലെ സലിം ഗ്രൂപ്പിന് വേണ്ടി നന്ദിഗ്രാമിലെ കര്‍ഷകരെ അടിച്ചോടിക്കാനും വെടിവെച്ച് കൊല്ലാനും തയ്യാറായവര്‍ ലോകഗുണ്ടാസംഘമായ അമേരിക്ക-ഇസ്‌റായേല്‍ സംഘത്തെ കടല്‍ കടത്തികൊണ്ട് വരികയാണ്.
2003 ന് ശേഷം മാത്രം നിരവധി തവണ ഇസ്രായേല്‍ ഗാസയില്‍ മനുഷ്യത്വ രഹിതമായി ഇടപെട്ടിട്ടുണ്ട്. ആഗസ്റ്റ് 21ന് ഹമാസ് നേതാവ് അബൂ ശിനാബിനെ ഗാസയില്‍ മിസൈലയച്ച് ഇസ്രായേല്‍ വധിച്ചു. 23ന് ഗാസയിലെ ആശുപത്രി ആക്രമിച്ചു. 28നും ആക്രമണം നടത്തി. അന്നുതന്നെ ഗാസ ഇസ്രായേല്‍ അധീനപ്പെടുത്തുമെന്ന് സൈനിക നായകന്‍ പ്രഖ്യാപിച്ചു. ഒക്‌ടോബര്‍ 2ന് വീണ്ടും ആക്രമണം നടത്തി. 27 ന് ഇസ്രായേല്‍ ബുള്‍ഡോസറുകള്‍ ഗാസയില്‍ വമ്പിച്ച നാശനഷ്ടങ്ങള്‍ വരുത്തി. 2004 ജനുവരി 22നും, 28,29നും മനുഷ്യത്വ രഹിതമായ ആക്രമണങ്ങള്‍ നടത്തി. നിരവധി മരണങ്ങളുണ്ടായി. ഫെബ്രുവരി 28, മാര്‍ച്ച് 2,7, ഏപ്രില്‍ 5, 19, മെയ് 11, ഓഗസ്റ്റ് 3,10,25, സെപ്റ്റംബര്‍ 7, 29, ഒക്‌ടോബര്‍ 1,5,12, 2012 നവംബര്‍ 18-21 തിയ്യതികളിലും  ഇസ്രായേല്‍ സൈന്യം ഗാസയില്‍ മൃഗീയാക്രമണങ്ങള്‍ നടത്തി നിരപരാധികളായ നൂറിലധികം പേരെ വധിച്ചു. രോഗികളേയും, കുട്ടികളെയും കൊലപ്പെടുത്തി.
അധിനിവേശ ജൂത കുടിയേറ്റ മേഖലകളും, ഫലസ്തീനികള്‍ താമസിക്കുന്ന സ്ഥലവും തമ്മില്‍ വേര്‍തിരിച്ചു നിര്‍ത്തുന്നതിന് 720 കി.മീ. നീളത്തില്‍ മതില്‍ കെട്ടിയിട്ടുണ്ട്. ഈ മതിലുകള്‍ തങ്ങള്‍ പൊളിക്കുമെന്ന് ഇസ്രായേല്‍ പരസ്യ പ്രസ്താവന നടത്തിയത് ഒരു തവണയല്ല. ജീവനും കൊണ്ട് ഭയപ്പാടോടെ കഴിയുന്ന ഫലസ്തീനികള്‍ തൊട്ടപ്പുറത്ത് 1 കി.മീ. അകലെയുള്ള ആശുപത്രിയിലെത്താന്‍ 720 കി.മീ. സഞ്ചരിക്കേണ്ടി വരുന്ന ദയനീയത പ്രമുഖ കോളമിസ്റ്റ് 'പ്രഫുല്‍ ബിദ്വായി'യെ ആശ്ചര്യപ്പെടുത്തി.
     'പരിഷ്‌കൃത സമൂഹം എന്നും; വിദ്യാഭ്യാസ പുരോഗതിയും, ജനാധിപത്യ ബോധവും വളര്‍ന്നു എന്നും അവകാശപ്പെടുന്ന ഈ നൂറ്റാണ്ടിലും മതത്തിന്റെയും, പ്രദേശത്തിന്റെയും പേരില്‍ ഒരു ജനവിഭാഗം അനുഭവിക്കുന്ന ദുരന്തങ്ങള്‍ക്ക് പരിഹാരമില്ലാത്തത് ആശ്ചര്യകരം തന്നെ'.! വേട്ടക്കാര്‍ക്കൊപ്പം അണിചേര്‍ന്ന് വേട്ടയാടപ്പെട്ടവന് ഉപദേശം നല്‍കുന്ന കാടന്‍ നീതി ശാസ്ത്രമാണ് അന്താരാഷ്ട്ര തലങ്ങളില്‍ നിന്ന് നാം കേള്‍ക്കുന്നത്.